19 маусым күні «Өмірлік қиын жағдайдағы балаларды қолдау орталығының» базасында балалардың әлеуметтік және эмоционалдық дағдыларын дамытуға бағытталған коммуникациялық тренинг өтті. Іс-шараны ПҚО психологтары ұйымдастырды. Тренингке мектепке дейінгі және ересек топтағы 24 бала қатысты. Қатысушылар топтық ойындар мен шығармашылық тапсырмаларға белсенді қатысып, бір-бірімен сенім мен өзара түсіністікке негізделген қарым-қатынас орнатуға мүмкіндік алды.
Балалар арт-терапия және бірлескен шығармашылық жаттығулар арқылы өз сезімдерін ашық білдіріп, пікір алмасу, тыңдай білу, қолдау көрсету секілді маңызды әлеуметтік дағдыларды меңгерді. Ойын арқылы олар бір-біріне жақындай түсіп, шынайы достық пен мейірімділікке алғашқы қадамдар жасады. Орталық мамандарының айтуынша, мұндай тренингтер балалардың ішкі сенімін нығайтып, эмоционалдық тұрақтылығын арттыруда маңызды рөл атқарады.